Skandali seksual në Shërbimin Sekret Amerikan

Senatori Lieberman udhëheq hetimin e Kongresit ndaj Sherbimit Sekret. 64 akuza për shkelje të normave profesionale janë ngritur ndaj agjentëve të Shërbimit Sekret Amerikan, të cilët janë përfshirë në skandale seksuale gjatë pesë viteve të fundit.

Kryetari i komisionit të Senatit që po dëgjon çështjen, Joseph Lieberman, theksoi se të dhënat janë “shqetësuese”, ndërsa nisi punimet e hetimit të parë kongresional që ka përfshirë agjencinë në skandalin e prostitucionit në Kolumbi.

64 të akuzuarit janë fajësuar për pagimin për raporte ndërsa ishin në detyrë dhe për dërgimin e emaileve me përmbajtje seksuale, por njëri rast është duke u hetuar për marrëdhënie me dhunë.

Pasi skandali u zbulua nga “Washington Post”, tetë punonjës të Shërbimit Sekret, përfshi dy në role drejtuese, humbën vendin e tyre të punës, ndërsa dhjetëra të tjerë janë duke u hetuar për përfshirjen e tyre.

Agjentët e Shërbimit Sekret, një strukturë paralele me CIA-n që kujdeset me ruajtjen e sigurisë në SHBA dhe mbrojtjen e zyrtarëve të vendit, akuzohen se kanë realizuar këto shkelje në qytetin kolumbian të Kartagjenës, ku ishin të pranishëm në muajin prill, ndërsa përgatitën vizitën e presidentit Barack Obama në Samitin e Amerikës.

Skandali është përhapur së fundmi edhe me disa raste të tjera të dyshuara të regjistruara në të shkuarën.