Spanja vazhdon luftën kundër zjarreve në Tenerifa

Zjarrfikësit kanë luftuar gjatë gjithë natës me flakët në ishullin spanjoll të Tenerifes, që kanë shkaktuar evakuimin e disa qindra banorëve nga një prej qyteteve.

Të paktën 1800 persona u detyruan të braktisnin qytetin Vilaflor ditën e martë, për shkak të zjarreve, që zgjasin që prej ditës së diel.

Autoritetet lokale kanë bërë të ditur se flakët kanë përfshirë të paktën 2 mijë hektarë tokë, por për fat të mirë nuk kanë arritur në resorët e njohura turistike.

Banorët në fshatin Chirche u evakuuan gjithashtu ditën e mërkurë, për shkak të tymit të zjarreve, kanë bërë të ditur mediat lokale.

Ndërkohë, flakët raportohet se kanë arritur buzë Parkut Kombëtar të Teidës. Vetë parku nuk është i kërcënuar.

Ndërkohë, një zjarr tjetër në ishullin fqinj të La Palmas, që ka përfshirë rreth 500 hektarë, është vënë nën kontroll nga zjarrfikësit.

Helikopterë janë përdorur për të hedhur ujë mbi zonat e prekura. Spanja është goditur rëndë nga zjarret në pyje, pasi kaloi dimrin më të thatë në 70 vitet e fundit.