Strazimiri: Asociimi i PS në PSE, zhvillim pozitiv që erdhi nga firmosja e MSA

Deputeti i Partisë Demokratike Gent Strazimiri u shpreh sot se statusi i ri, është detyrim për të respektuar rregullat themelore të demokracisë, siç është pjesëmarrja në parlament “Partia Demokratike, shpreh vlerësimin e saj për marrjen zyrtarisht të “Statusit të Anëtarit të Asociuar” në Partinë Socialiste Evropiane, nga Partia Socialiste e Shqipërisë. E vlerësojmë këtë, si një zhvillim pozitiv që vjen automatikisht si rezultat i faktit, që Shqipëria ka firmosur dhe ratifikuar nga të 27 vendet anëtare të Bashkimit Evropian, Marrëveshjen e Asociim-Stabilizimit, ç’ka përbën një kusht “sine qua non” për një parti, për të marrë statusin e anëtarit të asociuar. Me këtë rast, do të ishte e udhës që zoti Rama, të kërkojë ndjesë publike për bilbilat dhe boritë që përdori për të bllokuar firmosjen e Marrëveshjes së Asociim Stabilizimit me Bashkimin Evropian, dhe ç’është më e rëndësishmja, të kuptojë se statusi i ri, është i denjë vetëm për parti që respektojnë rregullat themelore të demokracisë”. I pyetur nga gazetarët e pranishëm për të komentuar faktin që z.Rama thotë se Partia Socialiste është “anëtare me të drejtë vote” në PES, zoti Strazimiri u përgjigj si më poshtë vijon: “ Uroj që të mos jetë si puna e rezolutës, për të cilën Rama mashtroi shqiptarët sikur u miratua duke detyruar PES ta përgënjeshtrojë si mashtrim të Ramës”