Studentët e Juridikut në protestë për ndërtesën e prishur

Studentët e Juridikut prej dy javësh nuk po studiojnë në auditorë, për shkak se ndërtesa është çarë në disa vende. Ata kanë protestuar sot para MASH duke akuzuar këtë dikaster për indiferencë dhe neglizhencë ndaj problemit të tyre. 

TIRANE- Studentët e Fakultetit Juridik kanë protestuar sot pranë Ministrisë së Arsimit duke akuzuar këtë dikaster për neglizhencë dhe indiferencë ndaj problemit të tyre, që i ka lënë për më shumë se dy javësh mësim. Gjendja kritike e godinës ka shkaktuar bojkotin e procesit akademik në këtë fakultet prej më shumë se dy javësh. Për zgjidhjen e këtij problemi Rektori i Universitetit të Tiranës Dhori Kule deklaroi se aktualisht janë vënë në dispozicion disa ambiente për rifillimin e mësimit.

Në fjalën e tij rektori Dhori Kule u shpreh se “me ndërhyrje të MASH jemi në tratativa për të zgjidhur këtë problem në tre objekte. I sigurt është objekti i kinoklubit të Qytetit Studenti, është një shkollë 9 vjeçare, gjithashtu është ndërhyrë për gjimnazin “Petro Nini”, ku pas përfundimit të mësimit të gjimnazistëve të lihet në dispozicionin tonë. Njëherazi edhe rektori i Universitetit Politeknik po rakordon me dekanin e Gjeologjisë që edhe ambientet e këtij Fakulteti të vendosen në dispozicionin tonë pasi ata të mbarojnë mësimin”.

Sipas rektorit Kule, më e rëndësishme është zgjidhja në perspektivë e problemit dhe për këtë është duke u projektuar ndërtimi i një kampusi të ri universitarë.
Deri në ndërtimin e nevojshëm të këtij kampusi universitarë, studentët do të jenë të detyruar të zhvillojnë mësimin me dy turne dhe me auditorë të tejmbushur. (a.r/news24/balkanweb)