Suedi: Forcat e armatosura monitorojnë nëndetësen ruse në Detin Baltik

Një nëndetëse ruse që hyri në Detin Baltik të martën, më 14 tetor, është zbuluar dhe po monitorohet nga forcat e armatosura suedeze, të cilat e cilësuan veprimin si pjesë e një “operacioni rutinë” në bashkëpunim me aleatët ushtarakë.

Sipas një deklarate zyrtare, nëndetësja hyri në ujërat baltike përmes Brezit të Madh, një ngushticë në Danimarkë.

Ajo u rizbulua nga avionët luftarakë dhe anijet luftarake suedeze në zonën e Kattegatit, ngushticë që ndan Danimarkën nga Suedia, dhe që prej asaj kohe është nën vëzhgim të vazhdueshëm.

Forcat suedeze theksuan se operacioni është pjesë e përpjekjeve të zakonshme për të ruajtur sigurinë rajonale, duke shtuar se kanë “një pasqyrë të mirë të fqinjësisë sonë të afërt në përgjithësi”.

Ky incident vjen në një kohë kur tensionet në rajonin e Detit Baltik janë intensifikuar ndjeshëm pas pushtimit të Ukrainës nga Rusia në shkurt të vitit 2022.

Kryeministri suedez Ulf Kristersson deklaroi më herët këtë vit se “Suedia nuk është në luftë, por paqja nuk ekziston më”.

Pas më shumë se dy shekuj neutraliteti ushtarak, Suedia iu bashkua NATO-s në vitin 2024, duke shënuar një kthesë historike në politikën e saj të sigurisë.

/rtsh.al/