Sulme në Afganistan, vriten 6 ushtarë amerikanë

Një civil afgan i punësuar në një bazë të NATO-s në Afganistanin jugor ka qëlluar për vdekje tre ushtarë amerikanë, në të njëjtën ditë kur tre trupa amerikanë u vranë në një tjetër sulm të ngjashëm.

Koalicioni ndërkombëtar i udhëhequr nga NATO (ISAF) tha se sulmi ndodhi në rrethin Garmsir në provincën e Helmandit, në natën e së premtes ndërsa nuk u dha asnjë detaj tjetër rreth ngjarjes.

Gjithashtu të premten, një afgan i veshur me një uniformë të policisë hapi zjarr ndaj katër ushtarëve amerikanë në provincën e Helmandit, duke vrarë tre prej tyre. Zyrtarët afganë thonë se vrasësi ishte një polic i cili i kishte ftuar viktimat e tij për të ngrënë ushqim.

ISAF tha se të dy incidentet “nuk reflektojnë situatën e përgjithshme” në Afganistan.