TEL AVIV – Baerbock kritikon vendbanimet e kolonëve në Bregun Perëndimor

TEL AVIV, 6 shtator /ATSH-DPA/- Ministrja e Jashtme gjermane Annalena Baerbock i bëri thirrje Izraelit të ndalojë projektet e vendbanimeve të kolonëve në Bregun Perëndimor gjatë bisedimeve sot në Tel Aviv, pas vizitave në Arabinë Saudite dhe Jordani.

Diplomatja e lartë gjermane ndodhet në Lindjen e Mesme për të promovuar përpjekjet për të arritur një armëpushim dhe marrëveshje për lirimin e pengjeve midis Izraelit dhe Hamasit, si dhe për të rritur ndihmën humanitare në Gazën e shkatërruar nga lufta.

Pas 11 muajsh luftime, administrata e Biden tha këtë javë se beson se marrëveshja e armëpushimit mbetet e arritshme.

Por, kryeministri izraelit Benjamin Netanyahu këmbëngul që trupat të qëndrojnë në një zonë tampon në Gazë përgjatë kufirit me Egjiptin – një kërkesë që ka sjellë pengesën e fundit për një marrëveshje.

Baerbock i kërkoi qeverisë izraelite t’i japë fund projekteve të vendbanimeve të kolonëve në Bregun Perëndimor për të ndihmuar në ‘ndërtimin e besimit’ në rajon.

Duke folur pas një takimi me homologun e saj izraelit Israel Katz në Tel Aviv, ajo tha se ndërtimi i vendbanimeve në Bregun Perëndimor ishte në shkelje të qartë të ligjit ndërkombëtar.

“Për mendimin tim, qeveria izraelite gjithashtu mund të rifitojë besimin e humbur ndërkombëtar duke ndaluar projektet aktuale të vendbanimeve, si hap i parë”, tha ajo.

Qeveria e Izraelit duhet gjithashtu të ndërmarrë një “veprim më të fortë dhe më të dukshëm kundër akteve të dhunës të kryera nga kolonët radikalë”, tha Baerbock.

“Ky do të ishte një hap i rëndësishëm drejt zbutjes së tensioneve në Bregun Perëndimor”, shtoi ajo.

Baerbock tha një ditë më parë në Jordani se – Izraeli ishte një fuqi pushtuese atje dhe se ishte i detyruar – sipas Konventës së Gjenevës – të mbështeste ligjin dhe rendin në vend që ta rrezikonte atë.

“Kjo përfshin në mënyrë eksplicite mbrojtjen e popullsisë nga sulmet e kolonëve të dhunshëm radikalë”, tha ajo. //a.i/