TEL AVIV – Izraeli vazhdon sulmet në Gazë dhe Liban
TEL AVIV, 9 nëntor /ATSH-DPA/- Forcat Ajrore izraelite kanë sulmuar objektivat e Hezbollahut në Bejrutin jugor gjatë natës, tha sot ushtria në Telegram, ndërsa forcat e armatosura izraelite kryen gjithashtu sulme të mëtejshme në Rripin e Gazës.
Ushtria tha se forcat ajrore kishin goditur qendrat e komandës dhe një vend të prodhimit të armëve, së bashku me infrastrukturën terroriste shtesë që i përket organizatës terroriste Hezbollah në Dahiyeh – një periferi jugore e Bejrutit që konsiderohet të jetë një bastion i milicisë libaneze të mbështetur nga Irani.
“Gjatë ditës së kaluar, Forcat Ajrore izraelite goditën më shumë se 50 objektiva në Liban dhe Rripin e Gazës”, tha ushtria në Telegram.
Trupat tokësore izraelite eliminuan dhjetëra terroristë dhe shkatërruan një objekt të ruajtjes së armëve në kampin e refugjatëve, Jabalia në veri të Gazës.
Sulmet izraelite u raportuan gjithashtu në Rafah, ku trupat shënjestruan militantët dhe infrastrukturën terroriste.
Izraeli filloi fushatën e tij në Gazë pas sulmeve të 7 tetorit ndaj komuniteteve jugore izraelite të vitit të kaluar, ku militantët e udhëhequr nga Hamasi vranë rreth 1200 njerëz dhe rrëmbyen rreth 250 të tjerë.
“Rreth 43 000 palestinezë janë vrarë në luftën e vazhdueshme deri më tani”, sipas autoriteteve shëndetësore të kontrolluara nga Hamasi në Gaza. //a.i/