Tajlandë, përfundon rrethimi i aeroportit

Rrethimi një javor i aeroportit Ndërkombëtar të Bangkokut në Tajlandë ka përfunduar. Protesta anti-qeveritare përfundoi pas njoftimit se kryeministri tajlandez, Somchai Wongsawat, do të largohej nga posti. Gjykata Kushtetuese e vendit mori vendim të ndalonte aktivizimin në politikë të kryeminisitrit për pesë vjet. Njoftimin për përfundimin e bllokadës në aeroport e konfirmoi kreu i Autoritetit të Aeroportit në Tajlandë. Otopan Wicherat tha se kishte arritur një marrëveshje me protestuesit anti-qeveritarë që ata të largoheshin menjëherë nga aeroporti. Fluturimet e pasagjerëve do të fillojnë nga mesnata e datës 4 dhjetor, në kohë për ditëlindjen e Mbretit. Sipas BBC-së, personeli i sigurisë së aeroportit ka arritur tashmë atje dhe pritet të bëjë një inspektim të hollësishëm të ndërtesës së terminalit. Aleanca e Popullit për Demokraci, që e mbajti të pushtuar aeroportin për mbi një javë, shpalli fitore pasi Gjykata Kushtetuese mori vendimin se kryeministri Somchai Wongsawat, duhet të jepte dorëheqjen. Gjykata e shpalli atë fajtor për manipulim të votave. Megjithatë, sipas BBC-së, në Tajlandë nuk do të ketë zgjedhje të reja dhe partia në pushtet do të vazhdojë të mbetet të qeverisë, me një emër tjetër dhe me një udhëheqës të ri.