Teatri, zyrtarisht në rrjetin evropian

Teatri Kombëtar, zyrtarisht ka prezantuar para mediave, pranimin e tij me të drejta të plotë në Unionin e Teatrit Evropian Konvencional, ETC, në Francë. Përfshirja zyrtare në këtë organizëm do të thotë shkrirjen e kufijve institucional kulturor të teatrove evropiane, si dhe bashkëpunimin me institucionet e shteteve anëtare, në mënyrë që të zgjerohet promovimi dhe ballafaqimi i teatrit të këtyre vendeve. Po ashtu është parashikuar edhe një angazhim për rritjen e standardeve evropiane të Teatrit përmes pjesëmarrjes në projektet e përbashkëta, përgjegjësi për të marrë përsipër detyrimet dhe përfitimet që vijnë prej këtij anëtarësimi. Ndërkohë që drejtori i TK-së, Kristaq Skrami, ka përshëndetur këtë përfshirje duke thënë se “përfshirja e Teatrit Kombëtar në familjen tonë evropiane na zgjeron dimensionet e vështrimit, të pamjes e të njohjes. Ne kemi shumë nevojë të prekim traditën e madhe të larmishme dhe bashkëkohore, vazhdimisht kreative të teatrit evropian. Ne kemi shumë nevojë ta prekim atë nga afër, ta përjetojmë jo vetëm me format e sotme të komunikimit elektronik, por në sallën e Teatrit, së bashku me regjisorë, me aktorë dhe në prani të spektatorit. Njohja dhe qarkullimi i vlerave me homologët tanë kudo në Evropë do t’i japë impulse të fuqishme krijimtarisë së artistëve shqiptare”. Ky union i themeluar në vitin 1988 është një organizëm aktiv ku janë anëtare 40 teatro kombëtare të 22 shteteve evropiane si Zvicra, Rumania, Slloveni, Gjermani, Itali etj.