Terroristi mban në ankth Francën, pritet dorëzimi

E gjithë Franca po pret me frymën pezull dorëzimin e personit të dyshuar si autori i masakrave të fundit të regjistruara në jug të vendit. “Duam ta shmangim sulmin përfundimtar sepse duam ta kapim të gjallë, me qëllim që të gjykohet nga një gjykatë”, ka deklaruar ministri i Brendshëm francez, Claude Gueant.

Në një prononcim për edicionin e lajmeve të televizionit “TF1”, ministri ka theksuar se, “kushtet për dorëzimin e vrasësit të Tuluzës janë në diskutim e sipër”. Më herët vrasësi, i cili duhet të dorëzohej gjatë paradites, e shtyu për në mbrëmje dorëzimin e tij tek forcat e policisë. Lajmin e bëri të ditur prokurori i Parisit, Francois Molins.

Ndërsa disa orë më parë, ministri i Brendshëm përgënjeshtroi lajmin se përgjegjësi për masakrat në të cilat kanë humbur jetën shtatë persona ishte prangosur. Në një komunikim për mediat franceze, ai mohoi versionin e përhapur më parë nga mediat ndërkombëtare, ndërsa konfirmoi se policia vazhdon të mbajë të rrethuar të dyshuarin.

Ministri konfirmoi se personi në fjalë është një shtetas francez me origjine algjeriane, 24-vjeçar, i lidhur me Al Kaeden dhe i identifikuar si Mohamed Merah.

Më parë u përfol se vrasësi u vetdorëzua, por diçka e tillë nuk rezulton të jetë e vërtetë dhe se ai ende po reziston brenda banesës së tij. Sipas mediave, besohet se i riu ka dashur të “hakmerret për fëmijët palestinezë dhe për operacionet ushtarake të Francës jashtë kufijve”, kur ka kryer atentatin në shkollë duke vrarë tre fëmijë dhe një mësues. Më parë, ai kishte vrarë edhe tre ushtarë.

Dy oficerë policie janë plagosur gjatë shkëmbimit të zjarrit në shtëpinë e rrethuar ndërsa vëllai i të dyshuarit për vrasje është arrestuar. Edhe nëna e 24-vjeçarit është shoqëruar në komisariat, por ajo është shprehur se “ka shumë pak ndikim mbi djalin”.

“I dyshuari ka vizituar shpesh kohët e fundit Afganistanin dhe Pakistanin. Thotë se është një muxhahedin dhe është pjesë e Al Kaedës”, u shpreh ministri Claude Gueant. (tha)