Tonaj: Prokuroria të zbardhë telefonatat e Ndokës me zyrtarët e arrestuar për korrupsion

Sekretari i Përgjithshëm i PDK, Kol Tonaj, tha dje përmes një deklarate për shtyp se mbledhja e Këshillit Kombëtar të kësaj partie është e parregullt për shkak se në të merrnin pjesë vetëm 15 anëtarë nga 101 të tillë. Ai hodhi akuza se në këtë mbledhje merrnin pjesë vetëm drejtorë të Ministrisë së Shëndetësisë dhe kërkoi nga Departamenti i Adminsitratës Publike të reagojë ndaj këtij problemi. “Mbledhja e të ashtuquajturit Këshill Kombëtar, mbajtur dje është e kundërligjshme, sepse nga gjithsej 101 anëtarë të Këshillit Kombëtar morën pjesë vetëm 15 anëtarë.

Ajo ishte një mbledhje abuzive e administratës së Ministrisë së Shëndetësisë dhe drejtorëve rajonale me në krye ministrin e Shëndetësisë, Ndoka, në një ditë pune zyrtare, duke braktisur orarin e punës, për të cilin DAP duhet të reagojë ligjërisht.

Ne disponojmë kasetën e filmuar dhe do ta zbardhim atë.

Ky i ashtuquajtur Këshill Kombëtar i improvizuar u përpoq të marrë vendime absurde me mendësi bolshevike, duke përjashtuar cilindo që nuk mendon e vepron si Ndoka, njëlloj si “Vullnetarët e Enverit” që, kur të gjithë demokristianët e vërtetë luftonin për të rrëzuar Enverin e komunizmin, mblidheshin për të mbajtur gjallë sistemin diktatorial që kishte marrë fund”, - tha Tonaj.

Ai deklaroi se përjashtimet e Ndokës synuan kryetarët e degëve më të zgjedhur, ndërkohë që kryesia që ka mbledhur Ndoka përbëhet nga njerëz të pavotuar në parti dhe elektorat. “Ndoka dhe drejtorët e tij synuan të përjashtojnë nga partia anëtarë të kryesisë, zv/ministra, kryetarë degësh, anëtarë të Këshillit Kombëtar dhe deputetë të saj. Si për çudi, përjashtuan kryetarë degësh të partisë, që kanë rezultatet më të larta me mbi 9% të votave, kur e gjithë kryesia e Ndokës ka marrë 1.3% të votave. Në vend që të analizojnë defektet e tyre, ata zbulojnë armiq jashtë partisë dhe për çudi i gjejnë ata te z. Berisha dhe znj. Topalli.

I ashtuquajturi Këshill Kombëtar ishte i përbërë nga një bashkim i elementeve të ardhur nga partia e Metës dhe Milos dhe të emëruar drejtorë nga ana e z. Ndoka, kur dihet se të gjitha emërimet e Ndokës janë bërë sipas shijeve të tij personale, për të cilat tregohen barcoleta në të gjithë opinionin publik dhe në media”, - deklaroi Tonaj.

Gjithashtu, Sekretari i Përgjithshëm i PDK tha se duhen zbardhur lidhjet e Ndokës me zyrtarët që janë arrestuar për korrupsion. “Është rasti që të zbardhen bisedat e 9 zyrtarëve të lartë të Ndokes (por jo të Partisë) të arrestuar për korrupsion.

Vendimi më i rëndësishëm i tyre ishte lajthitja për të thirrur një Kongres, kur dihet që ata nuk mund të marrin më vendime, pasi janë të pezulluar dhe vetëm më datën 1 prill mund të zhvillojnë aktivitetet e tyre”, - tha Tonaj. Ai shtoi se gjykata e Tiranës e ka regjistruar Ndokën me dokumente false. “Ju bëjmë me dije mediave dhe opinionit publik se dje, z. Ndoka dhe administrata e tij kanë manipuluar dhe Gjykatën e Faktit, Tiranë, e cila ka pranuar, hedhur në short dhe gjykuar me një procedurë tepër të shpejtuar, për të futur në dosjen e partisë dokumente false. Këtë vendim të kundërligjshëm ne e kemi ankimuar dhe me këtë rast i bëjmë thirrje organeve të drejtësisë që të investigojnë punën e gjyqësorit. Kryesia e PDK dhe Këshilli Kombëtar po vazhdon rregullisht punën për zhvillimin e Kongresit”, - akuzoi Tonaj.