Topalli: Të vendosur për heqjen e imunitetit

Eurodeputetin Nicholaos Chountis: Klasa politike duhet të bashkëpunojë

Kryetarja e Kuvendit Jozefina Topalli shprehu sot zotimin e mazhorancës për heqjen e imunitetit të zyrtarëve të lartë. Gjatë takimit të zhvilluar me raporterin e Komisionit të Jashtëm në Parlamentin Europian, eurodeputetin Nicholaos Chountis i cili ndodhet në Tiranë në kuadër të përgatitjeve të rezolutës së Parlamentit Evropian për integrimin evropian të Shqipërisë, Topalli u ndal në disa prej zhvillimeve më të fundit në Shqipëri në funksion të plotësimit të rekomandimeve të Komisionit Evropian. Në takim u vlerësua trendi pozitiv i ecurisë së reformave në këtë drejtim.
Çështja e imunitetit, ishte një ndër temat ku dy personalitetet u ndalën gjerësisht gjatë takimit. Kryetarja e Kuvendit tha se mazhoranca është e vendosur për të përdorur të gjitha mjetet që ofron ligji dhe Kushtetuta për të realizuar këtë nismë të rëndësishme, kërkesë kyçe në paketën e kërkesave të KE.
“Presim një reagim pozitiv nga opozita për kufizimin apo heqjen e imunitetit. Mazhoranca pranoi tërësisht draftin me kërkesat e opozitës në lidhje me çështjen e imuniteteve por opozita sërish refuzoi ta votojë atë. Heqja e imunitetit është shumë e rëndësishme, është një mjet që barazon qytetarët dhe pushtetarët para ligjit por është gjithashtu një mjet që i jep vet opozitës më shumë hapësira për të kontrolluar qeverinë, ministrat etj. Mosmiratimi i kësaj nisme nga opozita, sigurisht që do të ketë kosto politike për të. Shqiptarët duan një Shqipëri pa imunitete dhe pa privilegje për pushtetarët”- u shpreh kryetarja e Kuvendit, Jozefina Topalli.
Lidhur me këtë çështje, eurodeputeti Chountis theksoi se e gjithë klasa politike duhet të dialogojë dhe të bashkëpunojë për heqjen e imunitetit, jo vetëm se është një kërkesë e KE, por edhe se është një mënyrë e mirë për transparencën dhe luftën kundër korrupsionit.
“Nuk duhet të ketë dallime për këtë çështje. Nuk duhet të trajtohet si një çështje politike, nga e cila përfiton njëra apo tjetra palë, kjo është një çështje që prek dhe interesat e qytetarëve të parëve ndaj duhet të ketë më shumë bashkëpunim dhe konsensus”- tha eurodeputeti Chountis.
Eurodeputeti Chountis rikonfirmoi mbështetjen e Parlamentit Evropian për integrimin e shpejtë të Shqipërisë në Bashkimin Evropian ndërsa vlerësoi përparimin që është shënuar kohët e fundit në finalizimin, siç tha ai, të shumë detyrave që Brukseli ka vënë ndaj vendit tonë.
“Askush nga vendet e BE nuk mund të mohojë progresin që Shqipëria ka shënuar. Është në përgjegjësinë e të gjithë palëve politike që të vijojnë ritmin e reformave që brenda këtij viti vendi të përfitojë statusin kandidat. Parlamenti Europian do të vijojë të mbështesë fuqishëm Shqipërinë, shumica e deputetëve në PE janë në favor të integrimit të tuaj. Ne urojmë që ju të përfitoni statusin këtë vit”- u shpreh eurodeputeti Chountis.
“Shqipëria ka kapërcyer periudhën e vështirë të bojkotit dhe bllokimit nga ana e opozitës. Sot situata është pozitive, janë hedhur hapa të rëndësishëm në kompletimin e shumë reformave, pjesë e rekomandimeve të KE. Parlamenti ka kaluar ligje të rëndësishme që kërkojnë 3/5 e votave, Avokatin e Popullit, është miratuar po me konsensus Reforma Zgjedhore dhe po punohet për realizimin e reformave të tjera të rëndësishme që afrojnë Shqipërinë me BE”- tha Kryetarja e Kuvendit.
 “Shqiptarët duan të marrin statusin e vendit kandidat dhe ne kemi bërë dhe vijojmë të bëjmë të gjitha përpjekjet për ta merituar atë. Kandidat në BE, do të ishte një moment i veçantë këtë vit, ku Shqipëria dhe shqiptarët festojnë 100-vjetorin e shpalljes së Pavarësisë”- u shpreh Kryetarja Jozefina Topalli.
Gjithashtu, kryetarja Jozefina Topalli dhe Eurodeputeti Chountis diskutuan gjithashtu edhe lidhur me performancën ekonomike në vend ku u vlerësua trendi pozitiv i rritjes ekonomike pavarësisht krizës financiare si dhe zhvillimi që po përjeton vendi falë investimeve të shumta në infrastrukturë, turizëm, energji, arsim, shëndetësi, bujqësi, etj,.