Topi: Withers, merita të pamohueshme

Presidenti i Republikës, Bamir Topi ka vlerësuar punën e ambasadorit amerikan në Tiranë, John Withers, me të cilin zhvilloi një takim lamtumire me rastin e përfundimit të mandatit.

“Ambasadori Withers do të mbetet i pazëvendësueshëm në kujtesën e popullit dhe institucioneve shqiptare për dashurinë, përkujdesjen dhe mënyrën e drejtpërdrejtë të të bërit diplomaci me një mendësi moderne, të shoqëruar edhe me kontributin e madh në përforcimin e urave të komunikimit dhe miqësisë tradicionale që lidh dy popujt dhe vendet tona”, ka deklaruar Topi.

Ndërsa diplomati amerikan nga ana e tij ka vlerësuar me nota pozitive punën e kreut të shtetit dhe është shprehur se po largohet nga Shqipëria me kujtimet më të mira.

Ai ka shprehur gjithashtu bindjen e tij se, asgjë nuk do ta ndalë popullin shqiptar që me vlerat, energjinë dhe vendosmërinë e tij të ndërtojë një Shqipëri sa më të mirë, të bazuar mbi vlerat universale të demokracisë, shtetit të së drejtës dhe rritjes së mirëqenies së gjithanshme.