Topi, homazhe për nder të prokurorit Xhevat Hana

Kanë nisur homazhet për nder të prokurorit Xhevat Hana, ndarë nga jeta pas një sëmundjeje të rëndë. Homazhet po mbahen për rreth 1 orë në ambientet e Qendrës Kulturore të Ushtrisë dhe më pas trupi i pajetë i prokurorit Hana do të përcillet në banesën e fundit në varrezat e Tufinës.

Homazhe ka zhvilluar sot kreu i shtetit Bamir Topi i cili ka lënë edhe një mesazh në librin e ngushëllimeve si dhe prokurorja e përgjithshme Ina Rama.  Gjithashtu homazhe ka zhvilluar edhe kryetari i Partisë Socialiste Edi Rama i shoqëruar edhe nga deputetët socialist Fatmir Xhafa, Taulant Balla, Vasilika Hysi dhe Ditmir Bushati.
 

Dje pak pas orës 18:00 trupi i pajetë i prokurorit Xhevat Hana mbërriti nga Italia në aeroportin “Nënë Tereza” ku u prit nga familjarë dhe kolegë te tij.

Xhevat Hana, humbi jetën më 5 janar në një spital në Itali, për shkak të një sëmundje të rëndë, ndërkohë që kreu i shtetit, prokurorë e kolege, e kanë quajtur humbje të madhe ndarjen e tij nga jeta.

Xhevat Hana, ka lindur në Librazhd më 28.03.1953, e nisi karrierën e tij në organet e hetimit në Mat, në Sarandë në Prokurorinë e Rrethit Tiranë, e më pas në Prokurorinë e Përgjithshme, ndërsa vitet e fundit si prokuror pranë Prokurorisë Për Krimet e Rënda Tiranë.
Gjithshtu Z. Xhevat Hana në periudhën 2003-2005 ka qenë Këshilltar Juridik i Presidentit të Republikës, si dhe Ndihmës/komisioner në Institucionin e Avokatit të Popullit.