Topi takon Uidhers dhe Montobion për zgjidhjen e krizës

Presidenti i Republikës, Bamir Topi, ka intensifikuar kontaktet jo vetëm me partitë, por edhe ndërkombëtarët

TIRANË - Presidenti i Republikës, Bamir Topi, ka intensifikuar përpjekjet e tij për gjetjen e një zgjidhje, me qëllim dhënien fund të krizës politike në vend. Pas negociatave jo zyrtare me drejtues të dy partive kryesore në vend, Kreu i Shtetit ka zhvilluar një takim të dytë, kësaj here në zyrën e tij më Ambasadorin amerikan në Tiranë, Xhon Uidhers.

Në takim mori pjesë edhe Ambasadori i Mbretërisë së Spanjës, Manuel Montobio de Balanse. Sipas njoftimit për shtyp të Presidencës, gjatë takimit u bisedua rreth situatës më të fundit politike në vend, përpjekjeve, mundësive e rrugëve kushtetuese dhe institucionale për të zgjidhur në një kohë sa më të shpejtë dhe normalizuar situatën politike në vend.

Përveç njoftimit për shtyp të Presidencës, secila prej palëve që mori pjesë në takim është treguar tepër e rezervuar për median për të bërë publike ndonjë lëvizje konkrete, që mund të rezultojë në funksion të zgjidhjes.

Ndërkohë, po dje gjatë takimit, Presidenti Topi dhe dy ambasadorët Uidhers dhe Montobio, diskutuan edhe për nevojën e vazhdimit të reformës në gjyqësor, duke nënvizuar rëndësinë e një sistemi gjyqësor plotësisht të paanshëm e profesional.

Dihet që Presidenti i Republikës po negocion me një grup ekspertësh në fushën juridike për të dekretuar kandidatura sa më profesionale dhe të paanshme nga politika, me qëllim plotësimin e vendeve vakante të Gjykatës Kushtetuese dhe Gjykatës së Lartë.