Trafikantët e Gërdecit

Kush do ta hajë dhe sa vite burg do të bëjnë ata që sajuan krimin shtetëror në Gërdec të Vorës? Këtë përgjigje që po bën publiku, kur nesër mbushen plot dy muaj kalendarikë nga shpërthimi apokaliptik, "Spiuni" u përpoq ta gjente, duke punuar mbi një lajm të prokurorisë. Krimet e Rënda kërkuan dje 45 vite burg, për 4 ish-ushtarakë që ishin kapur një vit më parë duke transportuar me qëllim trafikimi 100 mijë fishekë pistolete. Ata kishin marrë fishekë të kalibrit 7.62 milimetër në Mbreshtan të Beratit dhe do t'i këmbenin në Durrës, me pistoleta. Gërdeci është stekë tjetër, sepse nuk ishte punë barktharësh, por ishte punishte e qeverisë. "Albademil" ishte rregulluar që të bënte të gjitha punët aty, 40 kamionë të ushtrisë vejevinin përditë të ngarkuar me predha gjigante, kur mbaruan ripaketimet e fishekëve të kallashëve. Shtabi i Përgjithshëm kishte rregulluar të gjitha letrat, ish-ministri Mediu i kishte firmosur dhe kryeministri Berisha i kishte bërë VKM. Prokuroria, edhe dje nuk arriti t'ua ngecte në dorë deputetëve dhe t'ua mbushë mendjen që t'i hiqet imuniteti Fatmir Mediut. Katër ish-ushtarakët që morën dje pretencën, kishin bërë trafik në tentativë. Ndërsa ushtarakët dhe qeveritarët e Gërdecit, për të bërë 300 milionë dollarë biznes, vranë 26 njerëz, plagosën mbi 300, shkatërruan mijëra shtëpi, shkaktuan një dëm mbi 20 miliardë lekë dhe vranë qetësinë e shqiptarëve. Fajtorët? Të gjithë të përmendurit në krim, që janë ende jashtë qelive. Pretenca? Burgime të përjetshme. Sigurisht, nëse Prokuroria e Përgjithshme arrin t'i çojë në bankën e të akuzuarve të gjithë ata që sajuan krimin në Gërdec, i cili është ku e ku me shkëmbimin e fishekëve me pistoleta.