UKRAINË – Zelensky bën thirrje për ndihmë nga SHBA-ja dhe Evropa pas bombardimeve vdekjeprurëse ruse

KIEV, 6 tetor /ATSH-DPA/- Presidenti ukrainas, Volodymyr Zelensky tha dje se Rusia kishte lëshuar ​​rreth 550 raketa në vend gjatë natës në sulmin e fundit vdekjeprurës me rreze të gjatë veprimi të Moskës.

Zelensky tha se të paktën pesë persona ishin vrarë dhe 10 të tjerë ishin plagosur në të gjithë Ukrainën.

“Sulme u raportuan në rajonet Lviv, Ivano-Frankivsk, Zaporizhia, Chernihiv, Sumy, Kharkiv, Kherson, Odese dhe Kirovohrad”, shkroi presidenti në një postim në “Telegram”.

Forcat ajrore të Ukrainës thanë se Rusia kishte lëshuar ​​496 dronë dhe 53 raketa të llojeve të ndryshme.

“Mbrojtësit rrëzuan ose shtypën 439 dronë dhe 39 raketa”, thanë forcat ajrore, me tetë raketa të tjera që nuk arritën objektivat e tyre.

“Sulmet u përqendruan në Ukrainën perëndimore. Në qytetin e Lvivit, afër kufirit polak, të paktën katër persona u vranë dhe katër të tjerë u plagosën”, sipas Shërbimit Shtetëror të Emergjencave të Ukrainës (DSNS).

Ministria e Mbrojtjes e Rusisë e përshkroi sulmin si një sulm masiv me armë të drejtuara me precizion me rreze të gjatë veprimi, me bazë tokësore, detare dhe ajrore, duke synuar strukturat e kompleksit ushtarako-industrial të Ukrainës dhe objektet e infrastrukturës së gazit dhe energjisë që mbështetën operacionet e tyre. //a.i/