Ushtarët gjermanë nga Afganistani direkt e në Kosovë

Dërgimi i ushtarëve gjermanë nga Afganistani në Kosovë, pa pushim mes dy misioneve, ka ngjallur kritikë. I ngarkuari i Bundestagut për Mbrojtjen kërkon përmirësim të kushteve për ushtarët në Kosovë.

I ngarkuari për Mbrojtjen i Bundestagut, Helmut Königshaus (FDP) e kritikoi ashpër trajtimin që Bundeswehri u bën ushtarëve në misione në botën e jashtme. "Për çfarë planifikimi' bëhet fjalë, kur ushtarë të kthyer nga Afganistani dërgohen praktikisht pa ndërprerje në një angazhim në Kosovë?", shkruan ai sot në botimin e majit të revistës së ipeshkvit ushtarak katolik "Kompass"

Për disa ushtarë dhe familjet e tyre kjo do të thotë më shumë se një vit mision në botën e jashtme "praktikisht pa pushim, pa shplodhje", theksoi Königshaus. "Kjo është shumë qartë mungesë interesi për mirëqënien e ushtarëve që u janë ngarkuar planifikuesve", transmeton DW

I ngarkuari me çështjet e Mbrojtjes të Bundestagut kërkoi veç kësaj "me urgjencë" përmirësime në strehimin dhe përkujdesjen e ushtareve dhe ushtarëve në Kosovë.