V E N D I M PËR MIRATIMIN E LISTËS KOMBËTARE TË PROFESIONEVE

V E N D I M 

PËR 

MIRATIMIN E LISTËS KOMBËTARE TË PROFESIONEVE

Në mbështetje të nenit 100 të Kushtetutës dhe të pikës 3,  të nenit 27, të    ligjit nr.8872, datë 29.3.2002, “Për arsimin dhe formimin profesional në Republikën e Shqipërisë”, të ndryshuar, me propozimin e ministrit të Arsimit dhe Shkencës dhe të ministrit të Punës, Çështjeve Sociale dhe Shanseve të Barabarta, Këshilli i Ministrave

V E N D O S I :

1.     Miratimin e listës kombëtare të profesioneve, që i bashkëlidhet këtij vendimi.

2.     Lista kombëtare e profesioneve të zbatohet nga ministritë e institucionet e tjera qendrore, organet e pushtetit vendor dhe personat, juridikë e fizikë, që ushtrojnë veprimtari ekonomike.

3.     Lista kombëtare e profesioneve të zbatohet në këto veprimtari:

a)     Mbledhjen, klasifikimin dhe publikimin e të dhënave statistikore në fushën e profesioneve;

b)     Regjistrimin e kërkuesit të punës, të përfituesit të pagesës së papunësisë, të vendit të lirë të punës dhe të të punësuarit;

c)     Ndërmjetësimin për punë e profesion të kërkuesit të punës;

ç)  Arsimin dhe formimin profesional të kërkuesit të punës ose të të punësuarit;

d)  Migracionin e kërkuesit të punës, shqiptar ose të huaj, në shtete të tjera dhe në Shqipëri;

dh)  Strukturimin e pagave në veprimtarinë, shtetërore dhe private;

  e)  Veprimtaritë e tjera, që miratohen nga Këshilli i Ministrave.

4.     Lista kombëtare e profesioneve ndryshon dhe përshtatet, në bazë të rekomandimeve të Agjencisë Kombëtare të Arsimit dhe Formimit Profesional, në përputhje me kushtet e reja të zhvillimit dhe në bashkëpunim me partnerët socialë.

5.     Nomenklatura e profesioneve përbëhet nga:

a)     emërtimi i profesionit;

b)     kodi numerik i profesionit;

c)     përshkrimi i profesionit.

6.     Kodi numerik i profesionit është një bashkësi me 6 shifra, të cilat tregojnë, përkatësisht,:

a)     Shifra e parë “Grupin e profesionit”;

b)     Shifra e dytë “Nëngrupin e profesionit”;

c)     Shifrat e tretë dhe e katërt, së bashku, “Profesionin”;

ç)  Shifrat e pestë dhe e gjashtë, së bashku, “Punësimin”.

7.     Vendimi nr.272, datë 8.5.1995, i Këshillit të Ministrave, “Për miratimin e nomenklaturës së profesioneve dhe punësimeve”, shfuqizohet.

Ky vendim hyn në fuqi pas botimit në “Fletoren zyrtare”.

K R Y E M I N I S T R I

SALI  BERISHA