V E N D I M PËR ADMINISTRIMIN E FONDIT SPECIAL TË KOMPENSIMIT TË PRONAVE

V E N D I M  

PËR

ADMINISTRIMIN E FONDIT SPECIAL TË KOMPENSIMIT TË PRONAVE

Në mbështetje të nenit 100 të Kushtetutës, të ligjit nr.9235, datë 29.7.2004,   “Për kthimin dhe kompensimin e pronës”,  dhe të nenit 23, të ligjit nr.9482, datë 3.4.2006, “Për legalizimin, urbanizimin dhe integrimin e ndërtimeve pa leje”, të ndryshuar, me propozimin e ministrit të Financave, Këshilli i Ministrave

V E N D O S I :

1. Fondi i kompensimit të pronave, i krijuar me ligjin nr.9235, datë 29.7.2004, “Për kthimin dhe kompensimin e pronës”, trajtohet si fond special dhe administrohet në një llogari të veçantë, në thesarin e Bankës së Shqipërisë.

2. Administrimi i fondit të kompensimit të pronave bëhet nga  Agjencia e Kthimit dhe Kompensimit të Pronave.

3. Burimet e krijimit të fondit të kompensimit të pronave janë:

a)     transfertat e buxhetit të shtetit për kompensimin e ish-pronarëve;

b)     të ardhurat e realizuara nga shitja me ankand e pasurive shtetërore, për të cilat nuk ka vendim të dhënë nga komisionet e kthimit dhe kompensimit të pronave (sipas përcaktimit në shkronjat “a” e “b”, të pikës 27, të kapitullit III, të vendimit nr.1638, datë 17.12.2008, të Këshillit të Ministrave);

c)     të ardhurat e arkëtuara nga transferimi i pronësisë së parcelës ndërtimore, në bazë të përcaktimit të shkronjës “b”, të pikës 1, të nenit 32, të ligjit nr.9482, datë 3.4.2006, “Për legalizimin, urbanizimin dhe integrimin e ndërtimeve pa leje”, të ndryshuar;

ç)  të ardhura nga donatorë të ndryshëm.

4. Fondi i kompensimit të pronave përdoret për kompensimin në vlerë të      ish-pronarëve, që kanë fituar të drejtën e kompensimit financiar, në kushtet kur kthimi fizik i pronës së tyre ka qenë i pamundur.

5. Burimet, që përbëjnë fondin e kompensimit të pronave, sipas pikës 3, të këtij vendimi, të arkëtohen dhe administrohen, sipas natyrës së tyre, nëpërmjet sistemit të thesarit, në përputhje me udhëzimin e ministrit të Financave, të nxjerrë në zbatim  të këtij vendimi. 

6. Për pronarët e shpronësuar nga procesi i legalizimit të ndërtimeve informale, shuma e pagesës për secilin përfitues përcaktohet me vendim të veçantë të Këshillit të Ministrave. Dhënia e pagesës bëhet me këste të barabarta dhe të shtrira në kohë, në varësi të të ardhurave të arkëtuara nga pronat e legalizuara.

7. Për pronarët e tjerë, të cilët kanë fituar të drejtën e kompensimit monetar nga komisioni i kthimit të pronave, shuma e pagesës dhe mënyra e dhënies së saj bëhet në përputhje me kriteret e përcaktuara me vendime të veçanta të Këshillit të Ministrave.

8. Gjendja e mjeteve monetare, të papërdorura në fund të vitit buxhetor, në llogarinë e veçantë, në Bankën e Shqipërisë, mbartet për llogari të vitit të ardhshëm.

9. Llogaritë e fondit special të kompensimit të pronave paraqiten në Kuvendin e Republikës së Shqipërisë, së bashku me buxhetin faktik.

10. Ngarkohet ministri i Financave për nxjerrjen e udhëzimit përkatës, në zbatim të këtij vendimi.

11. Ngarkohen Ministria e Financave, Agjencia e Kthimit dhe Kompensimit të Pronave dhe ALUIZNI për zbatimin e këtij vendimi.

Ky vendim hyn në fuqi pas botimit në “Fletoren zyrtare”.

K R Y E M I N I S T R I

SALI BERISHA