VEZHGIM/ Vera e krimeve dhe vrasjet horror të grave të divorcuara

Dy muajt më të nxehtë të verës, korrik e gusht, por edhe janari, muaji i parë i vitit, duket se kanë hyrë në historinë post-komuniste shqiptare si periudha të lulëzimit të krimit.

Thuajse gjithmonë vrasjet më të rënda ndodhin në këtë periudhë. Është e lehtë të konstatosh se këto ditë ka një shtim të krimit. Raportohet për njerëz të lidhur me botën e krimit që ekzekutohen në mënyrë mafioze, sikundër dëgjojmë lajme tronditëse të krimit në familje si ajo i bashkëshortes që i hodhi vaj të nxehtë të shoqit në vesh.

Por lajmi i gjetjes së një 25 vjeçareje të masakruar me mjete të mprehta në Shëngjin është ndoshta më i rëndi. Viktima, Anisa Opingari, ishte divorcuar nga i shoqi. Ajo ishte me origjinë nga Berati dhe kishte dy fëmijë. Lajmi bëhet i rëndë për shkak se është i treti brenda pak kohësh, kur gra të divorcuara, të moshës së Anisës ose diçka më të mëdha, masakrohen. Para pak ditësh u vra një 35 vjeçare e divorcuar në Pogradec. Edhe ajo ishte masakruar. Kurse para këtij rasti, një tjetër e divorcuar u vra në sytë e vajzës së saj në Durrës.

Ndoshta të gjitha janë hipoteza, por fakti pse vriten në mënyrë kaq makabre dhe hidhen si plehra nëpër rrugë, tregon sa të vështirë e ka jetën një e divorcuar në shoqërinë shqiptare. Tre raste brenda pak ditësh do kishin shkaktuar tërmet në çdo shoqëri të civilizuar. Por këtu ndonjëherë nuk di nga tia nisësh që të diskutosh.