Vata e Gjokaj, shpresat e mbijetesës

Dy shqiptarë për të shpresuar te mbijetesa në Bundesligën II. TuS Kolbenz, skuadra ku militojnë Fatmir Vata dhe Ardian Gjokaj, e sheh veten në një situatë të vështirë dhe rrezikon të bjerë në Ligën 3. Pas 17 ndeshjeve, ata kanë grumbulluar vetëm 14 pikë dhe renditen në vendin e 16 (zona "play out"), të distancuar me tri pikë nga Hansa Rostok e një vendi më lartë. Mes 11 arsyeve të publikuara nga tabloidi gjerman "Bild", përse drejtuesit e klubit dhe tifozët duhet të shpresojnë te mbijetesa, janë edhe Fatmir Vata dhe shqiptari me pasaportë malazeze, Ardian Gjokaj. "Vata është rikthyer pas gjashtë muajsh dëmtim në tendinën e Akilit dhe po jep kontributin e tij për skuadrën. Ai është ‘zemra‘ e TuS Kolbenz dhe më në fund është kthyer në fushë", citonte "Bild" për ish-lojtarin kuqezi. Ndërkohë, arsyeja e dhënë për Gjokajn ishte: "Në sezonin e fundit realizoi 11 gola në 26 ndeshje. Në këtë sezon ka stonuar disi (vetëm një gol në shtatë takime), por kur është në gjendje të mirë mund të bëjë diferencën".