Vendos Madridi
Olympique Lyon dhe Real Madrid kanë luajtur baras 1:1 në Francë, në ndeshjen e parë të së tetës së finales së Ligës së Kampionëve.
Një ndeshje mjaft emocionuese, sidomos në pjesën e dytë, nuk ka nxjerrë fitues, kështu që ekipi që do të kalojë në çerekfinale do të përcaktohet vetëm pas ndeshjes së dytë, e cila do të zhvillohet në stadiumin ‘Santiago Bernabeu’ në Madrid.
Pjesa e parë ka qenë e zbehtë, me francezët më të mirë për një nuancë të vogël. Mirëpo, madrilenët e kanë filluar furishëm pjesën e dytë, duke goditur shtyllën me Ronaldon (nga gjuajtja e lirë), e më pas Sergio Ramos goditi tërthorësen, pas një gjuajtje me kokë.
Trajneri Jose Mourinho ka bërë zëvendësim adekuat dhe me kohë. Portugezi nxori nga loja sulmuesin e ‘padukshëm’ Adebayor, për Karim Benzema. Ishte pikërisht francezi, i cili vetëm disa minuta më pas, më saktësisht në atë të 65-të, e gjeti golin e ekipit mysafir, duke shënuar kështu kundër ish skuadrës së tij, 0:1.
Disavantazhi nuk i ka zmbrapsur vendësit. Madje, ata kanë filluar t’i rreshtonin sulmet deri në fund të ndeshjes, duke u treguar mjaft të rrezikshëm. Mundi i tyre u shpërblye në minutën e 83-të, kur Gomis u harrua nga mbrojtja spanjolle dhe me lehtësi shënoi nga afërsia, 1:1.
Ky rezultat i shkon për shtati madrilenëve, të cilët ndeshjen e kthimit e luajnë në shtëpi. Por, francezët nuk do të shkojnë në Madrid me flamur të bardhë.
Në sfidën tjetër të së martës, Chelsea i harroi problemet që ka në Angli, pasi fitoi ndaj Copenhagen 2:0, duke e siguruar pothuajse një vend në çerekfinale, pasi ndeshjen e kthimit do ta zhvillojë në shtëpi. Nicolas Anelka ishte hero i ‘Blues’, pasi shënoi të dyja golat, njërin në pjesën e parë e tjetrin në atë të dytë.
Liga e Kampionëve
E teta e finales
Rezultatet
Lyon – Real Madrid1:1
Copenhagen – Chelsea0:2