Vrau dy persona, ekstradohet i dënuari me vetëm 10 vjet burg

Tiranë, 5 Dhjetor, 14:14, NOA - Ekstradohet nga Italia, Bedri Sula, 35 vjeç, në Shkozet, Durrës, i dënuar me vetëm 10 vjet burg për vrasjen e dy personave në qytetin bregdetar, nëntë vjet më parë.

Burime nga Policia e Shtetit thanë për agjencinë NOA se, ekstradimi i tij është bërë pasi Gjykata e Durrësit, me vendimin të datës 30 korrik 1999, e ka dënuar këtë qytetar me 10 vjet burgim, për kryerjen e veprës penale të “vrasjes me dashje në bashkëpunim” dhe “mbajtjes pa leje të armëve luftarake”.

Sipas vendimit të gjykatës, shqiptari Bedri Sula, në datën 12 shkurt 1998, rreth orës 19:00, në bashkëpunim me vëllanë e tij Florenc Sula, kanë vrarë për motive të dobëta qytetarët Flamur Bermuça dhe Klodian Kozeli.

Mes dy palëve ka pasur një debat, për faktin se Saimir Sula, vëllai i vogël i Bedriut dhe Florencit, i kishte marrë viktimës, Klodian Kozeli, shumën prej 1000 lekë.

Pikërisht për shumën e mësipërme të parave ka ndodhur dhe vrasja e dyfishtë, që më pas nga gjykata u dënua me vetëm 10 vjet burg.

c.a/NOA