Vritet udhëheqësi i kryengritësve në Sudan

Për autoritetet e Khartumit ky është një lajm veçanërisht i gëzuar, pasi së bashku me grupin e tij kryengritës, Ibrahim ishte bërë përgjegjës për sulme të vazhdueshme kundër interesave të shtetit.

“Forcat tona ishin në gjendje që të shkatërronin brigadat e famëkeqit Khalil Ibrahim, i cili u vra së bashku me anëtarë të tjerë të grupit të tij”, deklaroi Alswarmi Khalid, një zëdhënës i ushtrisë. Ai e konsideroi drejtuesin e rebelëve si “armikun kryesor” të shtetit.

Sipas tij, Ibrahim mbeti i vrarë në zonën e Wad Bandës, duke u përpjekur të kalonte nga Darfuri për në shtetin e Suedanit të Jugut.

Luftimet midis kryengritësve nga Darfuri dhe autoriteteve sudaneze shpërthyen disa ditë më parë, pasi kryengritësit shpallën publikisht se do të ndërmerrnin një sulm ndaj kryeqytetit.