Xhaçka: Arritjet tona janë pranuar në mënyrë unanime nga 27 vende të BE!

Ministrja për Evropën dhe Punët e Jashtme, Olta Xhaçka ka deklaruar se arritjet e Shqipërisë janë pranuar në mënyrë unanime nga 27 vende të BE, ndërsa tha se objektiv i MEPJ për vitin 2022 është “mbajtja e Konferencës së parë Ndërqeveritare në kohë sa më të shkurtër”.  Zonja Xhaçka i bëri deklaratat e saj në mbledhjen e Këshillit Kombëtar të Integrimit Evropian që u mbajt të hënën, ku u diskutua ecuria e procesit të integrimit evropian.

Zonja Xhaçka u shpreh se, “Konkluzioni i dhjetorit të Këshillit të BE është që të mbahet sa më shpejt Konferenca e parë Ndërqeveritare”.

“Arritjet tona janë pranuar në mënyrë unanime nga 27 vende të BE”, tha zonja Xhaçka, ndërsa shprehu keqardhjen se “Shqipëria vijon të mbetet dëm kolateral i mosmarrëveshjes Bullgari- Maqedonia e Veriut”.

Ministrja për Evropën dhe Punët e Jashtme këmbënguli se “i kemi kryer “detyrat e shtëpisë” në zbatimin e programit të reformave gjithëpërfshirëse”. Ajo nënvizoi se, “raporti i Komisionit thekson se Shqipëria i ka plotësuar kushtet” dhe se ajo ka dëshmuar veten si një partner i besueshëm i BE”.

Xhaçka nënvizoi se objektiv i MEPJ për vitin 2022 është, “mbajtja e Konferencës së parë Ndërqeveritare në kohë sa më të shkurtër”.