Zëvendësministri Selimi merr pjesë në Forumin për siguri në Bratislavë
Zëvendësministri Selimi ka qenë folësi kryesor në sesionin e titulluar "Perspektiva e Kosovës në kontekstin e arkitekturës së sigurisë dhe politikës evropiane", para disa dhjetëra diplomatëve dhe ekspertëve, përfshirë përfaqësues të lartë të shteteve që nuk kanë njohur Kosovën.
Sesioni ka qenë i moderuar nga diplomati hungarez me eksperiencë, Istvan Gyurmati, President i Fondacionit për Demokraci Publike. Në fjalën e tij, Zëvendësministri Selimi ka folur për proceset e muajve të fundit, procesin negociues të pauzuar dhe mungesën e vullnetit të mirë në Beograd për të përfunduar kapitujt e hapur në mes të dy shteteve.
Zëvendësministri Selimi ka potencuar edhe arrestimet skandaloze që Serbia ka ndërmarrë ndaj sindikalistëve kosovarë.
Në kontekstin e konferencës “Globsec” që sivjet ka mbledhur mbi 500 liderë, diplomatë dhe ekspertë të politikës së jashtme nga mbarë bota, Zëvendësministri Selimi pati edhe takime me Drejtorin Politik të Ministrisë së Punëve të Jashtme të Sllovakisë, Peter Michalko.
Gjatë takimit me diplomatin e lartë sllovak u diskutuan çështjet e ndërlidhura me progresin politik në integrimet europiane. Z. Mihalcho konfirmoj se shteti i Sllovakisë përkrah perspektivën europiane të Kosovës dhe inkurajoi autoritetet e Kosovës të vazhdojnë bashkëpunimin e mëtutjeshëm me BE si mënyrën me të shpejtë të normalizimit të raporteve në Ballkan.
Zëvendësministri Selimi poashtu takoi Ministrin e Mbrojtjes së Norvegjisë, Espen Barth Eide dhe shumë ministra, diplomatë dhe ekspertë, me fokus të veçante në takime me përfaqësues shtetesh që nuk kanë njohur Kosovën nga BE dhe Afrika veriore.