Zgjedhjet, BE: Po ju vëzhgojmë me kujdes, të shmanget dhuna

Tiranë- Delegacioni i Bashkimit Evropian në vendin tonë ka deklaruar sot se po vëzhgon situatën parazgjedhore, ndërsa ka apeluar për shmangjen e dhunës. Nëpërmjet një deklarate të lëshuar për mediat, BE-ja shprehet se një nga gjërat bazë të këtyre zgjedhjeve, është realizimi i procesit në kushte paqësore.

“Delegacioni i Bashkimit Evropian në Shqipëri, në marrëveshje me krerët e misioneve të Bashkimit Evropian në Shqipëri, dëshiron të nënvizojë se po e ndjekim nga afër procesin zgjedhor. Ndër standardet evropiane dhe ndërkombëtare që presim të zbatohen, një ndër më të rëndësishmit është shmangia e dhunës, në përputhje me pritshmëritë e qytetarëve që zgjedhjet të zhvillohen në një mjedis të qetë dhe paqësor,- thuhet në deklaratë.

Më tej BE-ja u ka bërë thirrje të gjithë qytetarëve që të shmangin dhunën, ndërsa ka kërkuar që partitë politike tu japin udhëzime të rrepta anëtarëve dhe mbështetësve të tyre në lidhje me këtë shqetësim.