Zgjedhjet në Nordrhein Westfalen, test për Angela Merkelin

Kancelarja e Gjermanisë Angela Merkel dhe partia e saj demokristiane po përballen sot me një test të rëndësishëm zgjedhor, që do të tregojë shumë për popullaritetin e tyre në vend.

Sipas sondazheve, social demokratët në opozitë ishte paraparë të arrinin një fitore të ngushtë, në zgjedhjet lokale të shtetit të Nordrhein Westfalisë.

Zgjedhjet u detyruan të mbaheshin pasi në muajin mars qeveria e pakicës, e drejtuar nga social demokratët dhe të gjelbrit u rrëzua, pas pamundësisë së miratimit të buxhetit.

Sipas analistëve, votuesit pritet të hedhin poshtë disiplinën e ashpër fiskale të Merkelit si zgjidhje për problemet e shtetit të tyre me borxhet ndaj qeverisë federale.

Partia Demokristiane e Merkelit, në aleancë me Demokratët e Lirë, së fundmi humbi zgjedhjet në shtetin verior të Schleswig-Holstein, ku regjistroi edhe rezultatin më të dobët zgjedhor në 50 vitet e fundit.

Shtetin i Nordrhein Westfalisë është tejet i rëndësishëm, për të parë tendencën e zgjedhjeve të ardhshme të përgjithshme në vitin 2013, pasi ky është landi më i populluar dhe më i industrializuar i Gjermanisë.