“Zgjedhjet të qeta, rezultati u pranua, dinjitet për Shqipërinë”

Ambasadori i OSBE-së Eugen Vollfarth përfundon mandatin e tij 3-vjeçar në Shqipëri

4 ditë pas zgjedhjeve parlamentare të 23 qershorit, ambasadori i OSBE-së Eugen Vollfarth përfundon mandatin e tij 3-vjeçar në Shqipëri. Në fund të mandatit të tij, ai ka organizuar një pritje me krerët më të lartë të shtetit e politikës, por edhe gazetarë e diplomatë. Në fjalën e tij përmbyllëse ambasadori Vollfarth komentoi procesin e zgjedhjeve duke e quajtur të përmbushur misionin e tij në Shqipëri, pasi siç nënvizoi ai, procesi zgjedhor ishte i qetë dhe u pranua nga të gjitha palët. Kjo sipas ambasadorit, vlen të përgëzohet dhe e ngre Shqipërinë në një shkallë më të lartë dinjiteti. “Do doja që në prani të të ftuarve të thosha që jam shumë i emocionuar, puna jonë është bazuar tek puna në ekip dhe bëhet për Shqipërinë, për të ardhmen e saj. Misioni im është i përmbushur, pavarësisht mosmarrëveshjeve politike zgjedhjet prodhuan një rezultat të qartë dhe të pranueshëm dhe duhet përgëzuar mënyra e pranimit. Më gëzon fakti që Shqipëria është në një fazë të re, në një shkallë më të lartë dinjiteti”, tha ai.  Ambasadori tha para të ftuarve se misioni i tij do të vazhdojë në një vend tjetër siç është Kuvajti. Pak para se të përfundonte procesi zgjedhor ambasadori mblodhi në një takim në “Hotel Sheraton” ambasadoret e BE-së të akredituar në Tiranë. Edhe pse një takim informal, të pranishëm ishin kryetarja e misionit vëzhgues të OSBE/ODIHR-it Conny Mccormack, kryetari i misionit vëzhgues afatshkurtër të OSBE-së Roberto Battelli, ambasadori amerikan Alexander Arvizu dhe ambasadori i Delegacionit të Bashkimit Evropian Ettore Sequi.