Zhoze Murinjo, i kënaqur përgjysmë: Duhet të kishim fituar me lehtësi

"Jam i kënaqur me mënyrën se si luajti skuadra në pjesën e parë dhe për mënyrën se si luftoi në pjesën e dytë. Sigurisht nuk është asnjëherë e lehtë të luash kështu pas një ndeshjeje në Champions League, kemi bërë 3-4 ndryshime. Por ishte një ndeshje që duhet të përfundonte ndryshe, me më shumë lehtësi. Kemi pasur shumë vështirësi për ta mbyllur më herët ndeshjen, me traversën e Vieiras, apo rastet e tjera. Me një gol më shumë gjithçka do të ishte ndryshe, ndërsa rezultati 2-1 i dha shpresë Katanias dhe e bëri fundin e ndeshjes më shqetësues për ne". Në prononcimin e tij, trajneri i Interit e komentoi kështu ndeshjen, që sipas tij rezultoi më e vështirë se sa e kishte parashikuar. Më pas tekniku portugez shton se do të donte ta kishte gjithnjë në dispozicion Shnajderin "për ta orientuar skuadrën time nga pikëpamja sulmuese. Më duket një lojtar shumë i rëndësishëm për ne, nuk i kërkoj shumë, i kërkoj vetëm të rikuperohet sa më shpejt, që të luajë ndeshjen e ardhshme". Por tashmë ai ka ndërmend të përdorë "turnover"-in deri para ndeshjes së Ukrainës ndaj Dinamos së Kievit. "Bëmë ‘turnover‘, sepse e dinim që Kordoba ishte i gatshëm për të luajtur, kemi vendosur ta lëmë Samuelin të pushojë pak. E njëjta gjë vlen Për Stankoviç, sepse Vieira po jeton një moment shumë pozitiv, është mirë fizikisht, ka besim te loja e tij. Kemi bërë 2-3 ndryshime të vogla. Ku i dihet, ndoshta edhe kundër Palermos do të ndryshojmë 2-3 lojtarë, por në këto momente nuk kam një skuadër në formë për të bërë "turnover". Më pas duke bërë një krahasim mes Interit, Portos dhe Çelsit, të cilët i ka drejtuar në të kaluarën trajneri portugez, Murinjo thotë se "bëhet fjalë për skuadra të ndryshme, me të tjera profile lojtarësh, të cilët kur arrijnë në Europë, për të luajtur 2-3 ndeshje radhazi, janë të destinuara të dështojnë. Kjo do të më bëjë të mendohem që para ndonjë ndeshjeje të rëndësishme në Champions League të lëmë jashtë 3-4 lojtarë fondamentalë për ne dhe të rrezikojmë disi në kampionat, ku kemi 40 ndeshje për të luajtur. Tani do të duhet të vëmë bast më shumë mbi Champions Leaguen.