Zv/ministrja e Drejtësisë Brikena Kasmi: Kreshnik Spahiu të japë dorëheqjen nga nënkryetar i KLD-së

Një ditë më parë, në mbledhjen e paracaktuar të Këshillit të Lartë të Drejtësisë, zv/ministrja e Drejtësisë Brikena Kasmi i kërkoi nënkryetarit të KLD-së, Kreshnik Spahiu, të japë dorëheqjen nga kjo detyrë. Znj. Kasmi argumentoi se z.Spahiu ka nisur një tjetër angazhim dhe nuk ushtron më funksionin e tij si zëvendës titullar i Këshillit të Lartë të Drejtësisë. Kërkesën e saj për dorëheqjen e z.Spahiu, znj.ministrja e Drejtësisë, Kasmi, e ka përsëritur edhe sot në një prononcim për mediat. “I kam kërkuar publikisht zotit Spahiu dorëheqjen nga posti që mban aktualisht si nënkryetar i KLD-së. Kjo për mos ushtrim të detyrës. Spahiu prej kohësh nuk ushtron funksionin e tij, por prodhon politikë dhe kjo u vu rë qartë edhe në mbledhjen e KLD-së kur ai nuk u doli në mbrojtje gjyqtarëve të Kolegjit”- u shpreh zv/ministrja e Drejtësisë Brikena Kasmi.
Njëkohësisht, zëvendësministrja Kasmi kritikoi edhe qëndrimin e presidentit Topi, i cili si kryetari i KLD-së nuk i mbrojti gjyqtarët, megjithëse një veprim i tillë është në detyrimin ligjor të këtij institucioni. Sipas saj, kreu i shtetit bojkotoi pa arsye mbledhjen e KLD-së dhe se justifikimi i tij se cështja ishte me karakter teknik është i pa bazë, pasi ishte vetë kryetari i shtetit ai që thërriti mbledhjen e Këshillit të Lartë të Drejtësisë, pas letrës së dërguar në Presidencë nga 8 gjyqtarët e Kolegjit Zgjedhor.