Zyrtari i lartë ukrainas: Rusia po përgatitet për përshkallëzimin e luftës

Zyrtari i lartë ukrainas i sigurisë Oleksiy Danilov ka deklaruar se Rusia po përgatitet për përshkallëzimin maksimal të luftës në javët e ardhshme.

 “Këta do të jenë muaj përcaktues në luftë” tha Oleksiy Danilov, Sekretari i Këshillit të Sigurisë Kombëtare dhe Mbrojtjes së Ukrainës.

 “Jam i vetëdijshëm se luftimet kryesore janë ende për të ardhur dhe ato do të ndodhin këtë vit, brenda dy deri në tre muaj. Rusia po përgatitet për përshkallëzim maksimal. Është duke mbledhur gjithçka që është e mundur, duke bërë stërvitje dhe stërvitje. Kur bëhet fjalë për një ofensivë nga drejtime të ndryshme, për momentin mund të them se nuk po përjashtojmë asnjë skenar në dy-tre javët e ardhshme,” tha ai në një intervistë për Sky Neës.

Inteligjenca e Mbrojtjes e Ukrainës beson se lufta është “në prag” të një periudhe “shumë aktive”.

“Ne jemi në prag të një faze shumë aktive të armiqësive, shkurti dhe marsi do të jenë shumë aktivë”, tha në televizionin kombëtar Andriy Yusov, përfaqësues i Inteligjencës së Mbrojtjes së Ukrainës.

Zyrtarët ukrainas kanë paralajmëruar për disa kohë për një ofensivë të re ruse dhe kanë kërkuar armë më të fuqishme nga aleatët perëndimorë për t’i bërë ballë kërcënimit.

/rtsh.al/