Çitaku kërkon materializimin e perspektives evropiane

Gjatë ditës së dytë të vizitës në Bruksel, ministrja e Integrimit Evropian, Vlora Çitaku ka marr pjesë të mërkurën si paneliste në samitin “Balkans Scorecard” të organizuar nga Friends of Europe dhe Konrad Adenauer Stiftung, me ç’rast theksoi edhe një herë faktin se Kosova ka plotësuar të gjitha parakushtet për fillimin e dialogut për liberalizimin e vizave.

Zyra për Informim e Ministrisë së Integrimit Evropian bëri të ditur se gjatë samitit ministrja Çitaku ka nënvizuar nevojën e Kosovës për marrëdhëniet kontraktuale me BE-në dhe materializimin e perspektives evropiane, në mes tjerash përmes fillimit të procesit të dialogut për liberalizimin e vizave.

Përveç në samitin “Balkans Scorecard”, ministrja Çitaku ka zhvilluar takime edhe me zëvendëspresidenten e Parlamentit Evropian, Diana Ëallis dhe deputetët e Parlamentit Evropian, Eduard Kukan dhe Ulrike Lunachek.

Gjatë këtyre takimeve të ndara, ministrja Çitaku thuhet se ka njoftuar bashkëbiseduesit për zhvillimet e fundit politike në Kosovë.

Po ashtu, është diskutuar edhe agjenda evropiane e Kosovës, të arriturat e Kosovës në fushën e liberalizimit të vizave dhe hapja e dialogut, si dhe masat e Qeverisë për adresimin e rekomandimeve të Raportit të Progresit.

Në veçanti, Ministrja Çitaku falënderoj eurodeputeten Lunachek për hartimin e mocionit për rezolutë të fundit për Kosovën nga Parlamenti Evropian, përmes të cilit Parlamenti Evropian ka bërë thirrje pesë vendeve anëtare të BE-së të njohin pavarësinë e Kosovës.

Ndërkaq gjatë ditës së nesërme ministrja Çitaku dhe zëvendëskryeministrja Mimoza Kusari- Lila do të takojnë edhe komisionerin për Tregti, Karel De Gucht. Po ashtu, po nesër ministrja Çitaku do të zhvilloj takim me ministrin e Punëve të Jashtme të Holandes, Uri Rosenthal.