19-vjeçari kapet në Durrës duke shpërndarë kanabis në doza, arrestohet në flagrancë

Një 19-vjeçar është arrestuar nga Policia në Durrës pasi u kap në flagrancë duke shpërndarë lëndë narkotike të llojit kanabis sativa në zona të ndryshme të qytetit.

Operacioni u finalizua nga Specialistët për Hetimin e Narkotikëve, në bashkëpunim me shërbimet e Komisariatit të Policisë Durrës, si pjesë e goditjes së njëpasnjëshme të rasteve të shpërndarjes së drogës në doza të vogla.

I riu i arrestuar është shtetasi E. H., 19 vjeç, banues në lagjen nr. 13 të qytetit. Sipas të dhënave të policisë, ai dyshohet se shpërndante lëndën narkotike në disa lagje të Durrësit, në mënyrë të organizuar.

Gjatë kontrollit, policia sekuestroi një sasi kanabisi e ndarë në doza të gatshme për shitje, që u mor si provë materiale.

Materialet procedurale u referuan në Prokurorinë pranë Gjykatës së Shkallës së Parë Durrës, ndërsa hetimet vijojnë për zbardhjen e plotë të aktivitetit të tij dhe të ndonjë rrjeti të mundshëm të shpërndarjes së drogës në zonë.