BE: Sanksionet nuk duhet t’i japin fund diplomacisë me Iranin
Bashkimi Evropian ka bërë thirrje për ruajtjen e diplomacisë me Iranin, pavarësisht rikthimit të sanksioneve të ashpra kundër programit bërthamor të Republikës Islamike.
Përfaqësuesja e Lartë e BE-së për Politikën e Jashtme, Kaja Kallas, deklaroi të dielën se “kthimi i sanksioneve nuk duhet të jetë fundi i diplomacisë”, duke theksuar se një zgjidhje e qëndrueshme për çështjen bërthamore iraniane mund të arrihet vetëm përmes negociatave.
Komentet e Kallas vijnë pas aktivizimit të mekanizmit “snapback” nga Franca, Gjermania dhe Mbretëria e Bashkuar, në bazë të Rezolutës 2231 të Këshillit të Sigurimit të OKB-së. Ky mekanizëm rikthen automatikisht sanksionet e pezulluara sipas marrëveshjes bërthamore të vitit 2015, duke përfshirë kufizime mbi pasurimin e uraniumit, tregtinë e armëve dhe programin e raketave balistike të Iranit.
Ministri i Jashtëm iranian, Abbas Araghchi, paralajmëroi në OKB se Teherani mund të pezullojë marrëveshjen e inspektimit me Agjencinë Ndërkombëtare të Energjisë Atomike (IAEA), duke e cilësuar rikthimin e sanksioneve si “veprime armiqësore” dhe të papajtueshme me diplomacinë.
Ndërkohë, Udhëheqësi Suprem Ali Khamenei ka përjashtuar mundësinë e bisedimeve të drejtpërdrejta me SHBA-në, duke akuzuar Uashingtonin se kërkon “nënshtrim në vend të negociatave”.
BE-ja, përveç ndjekjes së linjës së OKB-së, mban edhe një regjim të pavarur sanksionesh ndaj Iranit, që mbulon shkeljet e të drejtave të njeriut, rreziqet e përhapjes bërthamore dhe mbështetjen e Teheranit për luftën e Rusisë në Ukrainë. Ky regjim është rinovuar deri në prill të vitit 2026.
The UN reimposed sanctions on Iran early Sunday over its nuclear programme. The EU will follow.
— Kaja Kallas (@kajakallas) September 28, 2025
This must not be the end of diplomacy with Iran.
A sustainable solution to the Iranian nuclear issue can only be achieved through negotiations.
Statement↓https://t.co/ah58A22ng4
/rtsh.al/