FOKUS – Greqia vazhdon të ndërtojë forcën ushtarake në Mesdhe

ATHINE, 15 janar /ATSH-DPA/ – Greqia ka marrë në dorëzim të parën nga katër fregatat më të fundit, secila me një kosto prej rreth 1 miliard eurosh, të cilat Athina i bleu nga Franca.

“Ky është një hap tjetër drejt sigurimit që askush të mos vërë në dyshim aftësinë parandaluese të vendit”, tha sot kryeministri grek Kyriakos Mitsotakis në ceremoninë e organizuar, për të mirëpritur anijen luftarake.

Blerja e anijeve të klasit “Belharra” është pjesë e programit të madh të armatimit në vend.

Athina ka planifikuar të investojë 25 miliardë euro në sisteme të reja armësh, anije, avionë luftarakë dhe teknologji moderne mbrojtëse deri në vitin 2036.

Programi i armatimit i BE-së për Veprimin e Sigurisë për Evropën (SAFE) do të përdoret gjithashtu për këtë qëllim.

Planet përfshijnë blerjen e 20 avionëve të fshehtë amerikanë F-35 dhe sistemeve të reja të mbrojtjes ajrore izraelite.

Edhe pse vendi është ende duke u rindërtuar pas krizës së rëndë financiare të viteve 2010-2018, shpenzimet e larta ushtarake nuk janë kritikuar as nga partitë politike dhe as nga popullsia.

Konflikti 10-vjeçar me Turqinë fqinje ka rezultuar në tensione të përsëritura midis dy anëtarëve të NATO-s, ndonjëherë duke arritur në konflikt të armatosur.

Ndër të tjera, mosmarrëveshja ka të bëjë me të drejtat e sovranitetit në Detin Egje dhe lëndët e para si, gazi natyror në Mesdhe.

Sipas burimeve ushtarake, situata aktuale ndërkombëtare po forcon qëndrimin e qeverisë konservatore, pasi konflikti për Groenlandën tregon se anëtarësimi në NATO nuk të mbron automatikisht nga agresioni, i kryer nga një partner tjetër i NATO-s.

Lufta në Ukrainë dhe paqëndrueshmëria në Lindjen e Mesme përmenden gjithashtu si arsye për riarmatim në shkallë të gjerë. //a.i/