FOKUS – IAEA kërkon sqarime mbi statusin e uraniumit në Iran

VJENË, 23 qershor /ATSH-DPA/ – Kreu i Agjencisë Ndërkombëtare të Energjisë Atomike (IAEA), Rafael Grossi, po kërkon sqarime nga Irani mbi vendndodhjen e materialit bërthamor.

Në një takim urgjent të bordit të guvernatorëve të IAEA-së në Vjenë, pas sulmeve të fundit të SHBA-së ndaj objekteve bërthamore iraniane, Grossi theksoi detyrimet përkatëse të Teheranit.

“Ministri i Jashtëm iranian Abbas Araghchi kishte njoftuar masa mbrojtëse për materialin dhe pajisjet bërthamore në ditën e parë të sulmeve izraelite”, tha Grossi.

Ai theksoi se çdo transport i materialeve bërthamore duhet t’i raportohet IAEA-së në përputhje me marrëveshjen detyruese të inspektimit midis autoritetit bërthamor dhe Iranit.

Sipas një raporti të IAEA-së, Irani zotëron më shumë se 400 kilogramë uranium me një nivel pastërtie prej 60%, që është pothuajse i përshtatshëm për armë.

Sipas diplomatëve, kjo mund të përdoret për të prodhuar disa armë bërthamore nëse materiali do të pasurohej më tej në 90%.

Teherani këmbëngul se nuk dëshiron të ndërtojë armë bërthamore, por shumë vende kohët e fundit janë shqetësuar gjithnjë e më shumë se Republika Islamike po i afrohet gjithnjë e më shumë mundësisë për të ndërtuar armë bërthamore.

“Tani është e nevojshme që inspektorët e IAEA-s të verifikojnë rezervat e Iranit me 60% uranium”, shtoi Grossi.

Sipas deklaratave të tij të mëparshme, ky material ishte ruajtur në Isfahan, ku Izraeli dhe SHBA-të kanë bombarduar disa objekte bërthamore.

Uraniumi ishte prodhuar më parë në objektet e pasurimit në Natanz dhe Fordou, të cilat gjithashtu u dëmtuan rëndë.

Grossi vuri në dukje se uzina nëntokësore e pasurimit të uraniumit në Fordou ka të ngjarë të jetë dëmtuar rëndë nga përdorimi i bombave masive amerikane./ /os/