HAGË – NATO: Sulmi i SHBA-së ndaj Iranit nuk është shkelje e ligjit ndërkombëtar

HAGË, 23 qershor /ATSH-DPA/- Sekretari i Përgjithshëm i NATO-s Mark Rutte tha sot se nuk beson se sulmet e SHBA-së ndaj Iranit shkelin ligjin ndërkombëtar – një ditë para se udhëheqësit e aleancës, përfshirë presidentin e SHBA-së Donald Trump të mblidhen në një samit në Holandë.

Duke folur në një konferencë për shtyp përpara takimit në Hagë, shefi i NATO-s u pyet për pikëpamjen e tij mbi legjitimitetin e sulmeve të SHBA-së ndaj vendeve kryesore bërthamore iraniane, gjatë fundjavës.

“Nuk do të pajtohesha që kjo është kundër ligjit ndërkombëtar, ajo që bëri SHBA-ja,” u përgjigj Rutte.

Pas më shumë se një jave sulmesh izraelite ndaj Iranit, të cilat Izraeli thotë se synojnë shkatërrimin e aftësisë së vendit për të ndërtuar armë bërthamore, SHBA-ja ndërhyri në luftë të shtunën në mbrëmje, duke bombarduar vendet bërthamore iraniane duke përfshirë “Fordow”, “Natanz” dhe “Isfahan”.

Përshkallëzimi ka shkaktuar alarm për një luftë të mundshme më të gjerë rajonale, me Lindjen e Mesme tashmë të shqetësuar për shkak të veprimit të Izraelit në Gaza.

Rutte theksoi se aleatët e NATO-s kanë rënë dakord prej kohësh që Irani nuk duhet të ndërtojë armë bërthamore.

“Aleatët i kanë kërkuar vazhdimisht Iranit të përmbushë detyrimet e tij sipas traktatit të mospërhapjes”, tha ai.

Udhëheqësit dhe ministrat që marrin pjesë në samitin e kësaj jave – i cili do të përqendrohet në rritjen masive të shpenzimeve të mbrojtjes së NATO-s – shpresojnë të mësojnë më shumë nga administrata Trump mbi strategjinë e saj në Lindjen e Mesme, pasi të gjithë sytë janë nga Teherani – për të parë nëse udhëheqja iraniane do t’i ekzekutojë kërcënimet e saj për hakmarrje. //a.i/