Hita takim me delegacionin nga EUROPOL: Forcim i mëtejshëm i bashkëpunimit
TIRANË, 8 prill /ATSH/ Drejtori i ri i përgjithshëm i Policisë së Shtetit, Skënder Hita zhvilloi takimin e parë me partnerët ndërkombëtarë, me delegacionin nga Qendra për Krimin e Organizuar dhe Krimet e Rënda në EUROPOL (ESOCC).
Delegacioni kryesohej nga Andy Kraag, drejtues i Qendrës kundër Krimit të Organizuar dhe Krimeve të Rënda në EUROPOL, i shoqëruar nga shefi i Njësisë në Projektin Analitik HROCG – Grupet Kriminale me Rrezikshmëri të Lartë, si dhe nga zëvendësdrejtuesi i njësisë në këtë projekt.
Gjatë takimit, Hita dhe Kraag vlerësuan marrëdhëniet e mira mes Policisë së Shtetit dhe Europol-it, duke theksuar rëndësinë e forcimit të mëtejshëm të bashkëpunimit.
Hita siguroi përfaqësuesit e delegacionit për angazhimin dhe vendosmërinë e tij dhe të Policisë së Shtetit për thellimin e mëtejshëm të këtij bashkëpunimi.
Ai theksoi se vetëm nëpërmjet bashkëveprimit të ngushtë dhe pa barriera mund të arrihen rezultate konkrete në luftën kundër krimit të organizuar.
Nga ana e tij, Kraag uroi drejtorin e Përgjithshëm Hita për detyrën dhe garantoi mbështetje të pakushtëzuar nga Europol për Policinë e Shtetit, në drejtim të shkëmbimit të informacionit për goditjen e krimit të organizuar, krimeve në fushën e narkotikëve, kontrabandimit të emigrantëve dhe krimeve kibernetike, duke zhvilluar hetime proaktive dhe operacione të përbashkëta me Europol-in dhe vendet anëtare të tij.
Gjithashtu, në fokus të diskutimeve ishte rëndësia e implementimit të strategjisë së re të Policisë së Shtetit kundër krimit të organizuar 2026-2028, si dhe Projekti Analitik HROCG, i cili përfshin identifikimin, profilizimin dhe ndjekjen e grupeve kriminale më të rrezikshme në nivel ndërkombëtar, analizën e rrjeteve kriminale, shkëmbimin e inteligjencës, si dhe koordinimin e operacioneve të përbashkëta për goditjen e tyre.
Ky projekt synon rritjen e kapaciteteve hetimore dhe operacionale, si dhe ndërhyrjen e sinkronizuar ndaj aktiviteteve kriminale ndërkufitare.
1 nga 3/gj.m/j.p/r.e/