I akuzuar për vrasje të mbetur në tentativë, arrestohet në Spanjë 36-vjeçari, pritet ekstradimi (EMRI)

Armando Ndreu është arrestuar në Spanjë me qëllim ekstradimin në Shqipëri, pasi akuzohet për vrasje të mbetur në tentativë dhe armëmbajtje pa leje.

Arrestimi i 36-vjeçarit nga Shkodra u krye në kuadër të operacionit ndërkombëtar “The Wanted”, pas shkëmbimit të informacionit mes Policisë së Shtetit dhe Interpol Madridit.

Sipas Policisë, në vitin 2022, Gjykata e Shkodrës i kishte caktuar Ndreut masën e sigurisë “Arrest në burg”.

Ai dyshohet se në mars të vitit 2022, për motive të dobëta, ka qëlluar me armë zjarri automatike në drejtim të një subjekti në pronësi të shtetasit S. S., në lagjen “Skënderbeg” të Shkodrës, duke shkaktuar vetëm dëme materiale.

Njoftimi i policisë:

Policia e Shtetit/Vijon operacioni ndërkombëtar i koduar “The Wanted”.

Arrestohet në Spanjë, me qëllim ekstradimin në Shqipëri, një shtetas i akuzuar për vrasje të mbetur në tentativë.

Si rezultat i marrjes së informacionit nga strukturat e Policisë së Shtetit dhe shkëmbimit në kohë të tij me Interpol Madridin, u finalizua një tjetër fazë e operacionit të koduar “The Wanted”.

Në kuadër të këtij operacioni, u arrestua provizorisht në Spanjë, me qëllim ekstradimin në Shqipëri, shtetasi A. N., 36 vjeç, lindur në Shkodër, i shpallur në kërkim ndërkombëtar.

Në vitin 2022, Gjykata e Shkallës së Parë të Juridiksionit të Përgjithshëm Shkodër i ka caktuar këtij shtetasi masën e sigurisë “Arrest në burg”, për veprat penale “Vrasja”, mbetur në tentativë, dhe “Mbajtja pa leje dhe prodhimi i armëve, armëve shpërthyese dhe i municionit”.

36-vjeçari akuzohet se në muajin mars 2022, për motive të dobëta, ka qëlluar me armë zjarri automatike në drejtim të subjektit në pronësi të shtetasit S. S., në lagjen “Skënderbeg”, duke shkaktuar vetëm dëme materiale.

Interpol Tirana vijon bashkëpunimin me Interpol Madridin për të finalizuar procedurën e ekstradimit të 36-vjeçarit në Shqipëri.