Izrael, opozita kërkon largimin e Netanyahut pas fitores së demokratëve në SHBA - ATSH -

IZRAElLi, 4 nëntor, AA/ ATSH/ Liderët e opozitës izraelite kanë kërkuar largimin e kryeministrit Benjamin Netanyahu, duke paralajmëruar se vazhdimi i qëndrimit të tij në pushtet rrezikon marrëdhëniet me Shtetet e Bashkuara dhe pozicionin ndërkombëtar të Izraelit.

Kreu i Partisë Demokratët, Yair Golan, deklaroi se rezultatet e zgjedhjeve të mesit të mandatit në SHBA kanë nxjerrë në pah dobësimin e mbështetjes politike për Netanyahun si te demokratët, ashtu edhe te një pjesë e republikanëve.

Sipas Golanit, vazhdimi i qeverisjes së Netanyahut, së bashku me ministrin e Sigurisë Kombëtare, Itamar Ben-Gvir, mund ta çojë Izraelin drejt sanksioneve ndërkombëtare, izolimit diplomatik dhe përplasjeve me Uashingtonin.

Ai theksoi se vendi ka nevojë për një qeveri që të rikthejë pozicionin e tij ndërkombëtar, të garantojë sigurinë dhe të ndërtojë marrëdhënie strategjike afatgjata.

Edhe ligjvënësi izraelit Gilad Kariv kërkoi largimin e kryeministrit, duke e akuzuar se ka dëmtuar marrëdhëniet e Izraelit me Partinë Demokratike dhe me një pjesë të konsiderueshme të republikanëve. Ai kundërshtoi gjithashtu mundësinë e krijimit të një qeverie uniteti nën drejtimin e Netanyahut.

Reagimet e opozitës vijnë pas fitores së demokratëve në të dyja dhomat e Kongresit amerikan, një goditje politike për presidentin Donald Trump, i cili ka mbështetur Netanyahun.

Në zgjedhjet e fundit parlamentare në Izrael, blloku i Netanyahut siguroi 53 vende në Knesset, nga 120 gjithsej, ndërsa partitë hebraike të opozitës morën 48 vende dhe partitë arabe 19. Rezultati e lë të hapur procesin e negociatave për formimin e qeverisë së re.

Sipas Ligjit Nr.35/2016 “Për të drejtat e autorit dhe të drejtat e tjera të lidhura me to”, i ndryshuar, ndalohet kopjimi, publikimi, shpërndarja dhe tjetërsimi pa cituar Agjencinë Telegrafike Shqiptare.