JEREVAN – Von der Leyen i kërkon Trump të respektojë tarifën prej 15% të BE-së
JEREVAN, 5 maj /ATSH-DPA/- Presidentja e Komisionit Evropian, Ursula von der Leyen i bëri thirrje Uashingtonit të respektojë angazhimet e tij sipas marrëveshjes së vitit të kaluar, për të kufizuar tarifat amerikane, pasi presidenti i SHBA-së, Donald Trump kërcënoi të rrisë detyrimet ndaj automjeteve, për shkak të shkeljeve të pretenduara nga blloku.
“Nga ana e Bashkimit Evropian, ne jemi tani në fazat përfundimtare të zbatimit të angazhimeve të mbetura për tarifat”, tha sot Von der Leyen.
“Në të njëjtën kohë, SHBA-ja ka angazhime, për shembull, në rastet ku përafrimi me tavanin e rënë dakord ende nuk është përmbushur”, tha ajo gjatë një vizite në Jerevan.
Trump njoftoi të premten se synon të rrisë tarifat për automjetet dhe kamionët e importuar nga BE-ja në SHBA në 25%, duke argumentuar se BE-ja nuk po i përmbahet një marrëveshjeje tregtare që kufizon tarifat amerikane për shumicën e produkteve të BE-së në 15%. Ai nuk dha detaje mbi shkeljet e raportuara.
BE-ja e ka hedhur poshtë këtë akuzë dhe ka kërcënuar SHBA-në me kundërmasa nëse ajo zbaton rritjen e shpallur të tarifave për mallrat e BE-së.
“Marrëveshja është marrëveshje, dhe ne kemi një marrëveshje”, tha Von der Leyen, duke shtuar se BE-ja është e përgatitur për çdo skenar.
Marrëdhëniet transatlantike janë bërë gjithnjë e më të tensionuara që nga rikthimi i Trump në detyrë janarin e kaluar, me mosmarrëveshje në rritje për çështje si Groenlanda, tarifat dhe refuzimi i vendeve evropiane për të marrë pjesë në luftën kundër Iranit. //a.i/