LONDËR – BM: Takimi SHBA-Rusi hapi i parë drejt negociatave serioze për paqe

LONDËR, 15 gusht /ATSH-DPA/- Takimi midis presidentit të SHBA-së Donald Trump dhe homologut të tij rus Vladimir Putin rreth luftës në Ukrainë mund të jetë hapi i parë drejt negociatave serioze për paqe, tha sot sekretari britanik i Mbrojtjes John Healey.

“Fundi i çdo konflikti duhet të vijë nga diplomacia”, tha Healey përpara takimit të dy udhëheqësve në Alaskë.

Udhëheqësit evropianë janë përgatitur për takimin dhe kanë shprehur shpresën për perspektivën e një armëpushimi të mundshëm – pas një bisede telefonike me presidentin amerikan Trump, në fillim të kësaj jave.

“Mësimi i parë është se ushtria dhe luftimet nuk zgjidhin asgjë në fund, dhe se fundi i luftës duhet të vijë përmes bisedimeve, duhet të vijë nga diplomacia”, tha Healey për BBC.

“Sot në Alaskë, ajo që shpresoj, të gjithë shpresojmë të shohim, është një hap i parë drejt negociatave serioze”, theksoi ai.

Trump sugjeroi dje që udhëheqësit evropianë mund të ftohen në një takim të dytë nëse takimi i tij me Putinin rezultonte i suksesshëm. //a.i/