LOS ANXHELES – Ushtria dislokon 700 marinsa, ndërsa protestat vazhdojnë

SAN JOSE (Kalifornia), 10 qershor /ATSH-DPA/ – Ushtria amerikane do të dërgojë rreth 700 marinsa në Los Anxheles, ndërsa protestuesit përleshen me zyrtarët e imigracionit për shkak të ndalimit të migrantëve pa dokumente.

Komanda Veriore e SHBA-së tha se rreth 700 marinsa do të integrohen me trupat e tjera që mbrojnë personelin dhe pronën federale në zonën më të madhe të Los Anxhelesit.

“Aktivizimi i Marinës synon t’i sigurojë Task Forcës 51 numrin e duhur të forcave për të siguruar mbulim të vazhdueshëm të zonës në mbështetje të agjencisë kryesore federale”, tha komanda në një deklaratë.

Presidenti amerikan Donald Trump urdhëroi ushtarët e Gardës Kombëtare të Kalifornisë të hynin në Los Anxheles gjatë fundjavës, pavarësisht kundërshtimit nga guvernatori, Gavin Newsom.

Ata u urdhëruan të vepronin kundër demonstruesve që protestonin kundër bastisjeve gjithëpërfshirëse që synonin njerëzit pa dokumente nga agjentët federalë të imigracionit.

Në rrethana normale, kontrolli i Gardës Kombëtare u takon shteteve individuale.

Megjithatë, në kohë lufte ose emergjence kombëtare, presidenti mund të marrë komandën.

Trump mendon se situata në qytetin e Bregut Perëndimor, ku njerëzit kanë demonstruar në numër të madh që nga e premtja kundër veprimeve të agjentëve të Imigracionit dhe Doganave, është jashtë kontrollit.

Zyrtarët lokalë, përfshirë Newsom dhe kryetaren e bashkisë së Los Anxhelesit, Karen Bass, e mohojnë këtë./  a.jor.