Lavrov akuzon SHBA-në se kërkon kontrollin mbi sektorin global të energjisë

Ministri i Jashtëm i Rusisë, Sergey Lavrov, ka akuzuar administratën e Trumpit se po përpiqet të “uzurpojë” ndikimin mbi tregun global të energjisë.

Qëllimi i Shteteve të Bashkuara është të detyrojë kompanitë ruse të energjisë si Lukoil dhe Rosneft të dalin nga tregjet ndërkombëtare, si pjesë e një strategjie më të gjerë për të kontrolluar rrjedhën globale të energjisë, tha Lavrov.

“Shtetet e Bashkuara kanë miratuar një sërë dokumentesh doktrinare, njëri prej të cilëve shpall se SHBA-ja duhet të dominojë tregjet globale të energjisë. Pra, qëllimi i tyre është krejtësisht i qartë: ata duan të sjellin çdo rrugë të rëndësishme furnizimi me energji nën kontrollin e tyre”, tha ai në një intervistë për transmetuesin RT India.

Deklaratat e Lavrovit vijnë në kohën kur SHBA-ja dhe Irani vazhdojnë bllokadat e tyre të veçanta në Ngushticën e Hormuzit, përmes së cilës kalon rreth 20 për qind e burimeve energjetike të botës.

/rtsh.al/