Qeveria dëmshpërblim mbi 53 milionë lekë për blegtorët, miratohet fondi për kafshët e groposura nga murtaja e vitit 2025
Këshilli i Ministrave ka miratuar një vendim të rëndësishëm për mbështetjen e fermerëve dhe blegtorëve shqiptarë, duke përcaktuar masën e dëmshpërblimit për dëmet e shkaktuara nga sëmundja e murtajës së ruminantëve të vegjël. Sipas vendimit më të fundit, qeveria do të vërë në dispozicion një fond prej 53,345,500 lekësh për të gjithë pronarët e kafshëve që u therën ose u eliminuan gjatë vitit 2025.
Ky fond synon të mbulojë humbjet e blegtorëve, kafshët e të cilëve rezultuan pozitive ndaj sëmundjes infektive, bazuar në analizat rigoroze të kryera nga Instituti i Sigurisë Ushqimore dhe Veterinarisë (ISUV). Vendimi vjen si një masë e domosdoshme për të lehtësuar barrën financiare mbi ekonomitë familjare rurale dhe për të garantuar vijueshmërinë e sektorit të blegtorisë.
Detajet e dëmshpërblimit dhe burimi i financimit
Dëmshpërblimi i akorduar do të lëvrohet nga buxheti i shtetit për vitin 2026. Fondet do të administrohen nga Ministria e Bujqësisë dhe Zhvillimit Rural, konkretisht përmes zërit të shpenzimeve korrente në programin “Siguria ushqimore dhe mbrojtja e konsumatorit”.
Procesi i dëmshpërblimit përfshin kafshët e therura për kontrollin e sëmundjes; kafshët e eliminuara dhe të shkatërruara; gropimet sanitare të kryera për të parandaluar përhapjen e murtajës.
Për të garantuar që fondet të shkojnë te pronarët e prekur sipas listave të përcaktuara në shtojcën e vendimit, janë ngarkuar dy institucione kryesore: Ministria e Bujqësisë dhe Zhvillimit Rural dhe Autoriteti Kombëtar i Veterinarisë dhe Mbrojtjes së Bimëve.
/rtsh.al/