Lefter Maliqi me mesazh politik: Beteja vazhdon, Hajdar shihemi së shpejti

Lefter Maliqi ka reaguar me një mesazh në rrjetet sociale, ku shprehet se, sipas tij, “hajduti, i paafti dhe abuzuesi” nuk mund të fitojnë. Në postimin e tij, Maliqi sjell edhe një episod nga karriera e tij në Policinë e Shtetit, duke e lidhur me zhvillimet aktuale politike.

Në reagimin e publikuar në rrjetet sociale, ish-deputeti shkruan se nuk beson se mund të triumfojnë ata që, sipas tij, kanë abuzuar me detyrën.”Kush mendon se fiton hajduti, i paafti dhe abuzuesi, gabon! Prisni, duroni dhe do të bindeni!”, shkruan Maliqi.

Maliqi rikujton se në vitin 2002, kur ishte shef i Komisariatit të Beratit, denoncoi publikisht, sipas tij, abuzimet e drejtorit të Policisë së qarkut.

Sipas tij, për shkak të këtij qëndrimi u shkarkua nga detyra dhe u caktua në pozicione më të ulëta, por nuk u tërhoq nga denoncimet.

Ai pretendon se disa vite më vonë drejtori i atëhershëm u dënua, ndërsa vetë vijoi karrierën në Policinë e Shtetit dhe më pas në politikë.

Në fund të reagimit, Maliqi shprehet se synon të fitojë drejtimin e Bashkisë së Kuçovës, duke premtuar ndryshime në qytet.

Po ashtu, ai i drejtohet me një mesazh Hajdarit, pa dhënë detaje të mëtejshme mbi kontekstin.”Beteja vazhdon. Hajdar, shihemi së shpejti, por në pozicione të ndryshme! Duro!”, përfundon Maliqi.