METEO – Skocia goditet nga stuhia “Floris”, me erëra të forta të pazakonta për stinën e vitit

EDINBURG, 4 gusht /ATSH/- Autoritetet në Skoci anuluan transportin hekurudhor, mbyllën parqet dhe paralajmëruan banorët të lidhnin trampolinat e oborreve, pasi një stuhi e rrallë verore solli erëra potencialisht shkatërruese në Britaninë veriore, sipas AP.

Zyra Meteorologjike e Britanisë së Madhe lëshoi sot një paralajmërim (të verdhë) për goditjen e Skocisë nga stuhia “Floris” – që do të thotë se ekziston një rrezik potencial për jetën dhe pronën, veçanërisht nga valët e mëdha në zonat bregdetare.

Rrjeti Hekurudhor i Skocisë njoftoi erëra me shpejtësi deri në 145 km/orë.

Era dhe shiu i rrëmbyeshëm po godasin në kohën më të ngarkuar të vitit për turizmin, me qindra mijëra turistë që dynden në Festivalin e Edinburgut “Fringe”dhe evente të tjera arti.

“Edinburgh Military Tattoo”, një nga atraksionet më të mëdha turistike të qytetit, tha se po anulonte performancën e planifikuar sot në natyrë, në Kështjellën e Edinburgut.

Kompanitë hekurudhore anuluan shërbimet në pjesën më të madhe të Skocisë dhe disa kalime tragetesh u anuluan gjithashtu.

“Stuhia “Floris”, gjithashtu mund të godasë pjesë të Irlandës së Veriut, Uellsit dhe Anglisë veriore”, tha Zyra Meteorologjike. //a.i/